БАТЫРЛЫК КАЙТАВАЗЫ: БӨЕК ҖИҢҮ КӨНЕНДӘ ТР ДӘҮЛӘТ ҖЫР ҺӘМ БИЮ АНСАМБЛЕ ТАМАШАЧЫЛАРГА «ӨЙГӘ ҖИҢҮ БЕЛӘН!» ПРОГРАММАСЫН БҮЛӘК ИТТЕ

Илебезнең иң мөһим һәм күңел кылларын тибрәндергән бәйрәме — Бөек Җиңү көнендә Татарстан Республикасы Дәүләт җыр һәм бию ансамбле Казан халкына һәм кунакларына онытылмаслык «Өйгә Җиңү белән!» концерт программасын бүләк итте.

Кремль диварлары янындагы борынгы ташта тарих битләре җанланып китте: биючеләрнең һәр хәрәкәтендә, җырларның һәр нотасында бөек батырлык истәлеге яңгырады. Артистлар халык сәнгатенең көчен сугыш темасы белән берләштерә алдылар, шуңа күрә тамашачыларның хис-кичерешләре аеруча эчкерсез иде. Сәхнәдә югалту һәм өмет, батырлык һәм Ватанга мәхәббәт хисләре тулы хореографик картиналар аша ачылганда тамашачылар күз яшьләрен тыеп кала алмадылар.

«Өйгә Җиңү белән!» программасы — гади концерт номерлары гына түгел, ә сугыш һәм тынычлык, аерылышу, зарыгып көтү, ышану, көрәшү һәм җиңү турында чын музыкаль-хореографик хикәят. Анда хәтерне җанлы һәм төрле буыннарга аңлаешлы итә торган сугыш чоры җырлары,  пластика һәм лирик образлар бер-берсе белән тыгыз үрелеп бара.

Ата-бабаларыбызның батырлыгы чыннан да үлемсез һәм аларның бөеклек кайтавазы алар турында мәңгелек хәтердә сакланган сәнгать әсәрләрендә яши. Нәкъ менә шулай, җыр һәм бию, интонация һәм ишарә аша төп кыйммәтләр: тарихка хөрмәт, ата-бабаларыбыз өчен горурлык, туган җиргә мәхәббәт тапшырыла.

ТР Дәүләт җыр һәм бию ансамбле традицияләрне саклап кына калмыйча гади, көчле һәм чын ихластан сөйләргә мөмкинлек бирә торган сәнгать формаларын таба. «Өйгә Җиңү белән!» программасы сугыш батырларын искә алу гына түгел, буыннар арасында мөһим күпер дә булды: ветераннар белән янәшәдә балалар һәм яшүсмерләр утырды һәм алар өчен бу концерт онытылмаслык тарих дәресе булды.

Бәйрәм көнендә музыка һәм бию барыбызга да шуны искәртте: халык батырлыгы — дәреслекләрдәге юллар гына түгел, ул безнең йөрәкләр аша яңгыраган җанлы тарих та. Халык сәнгате яши икән, хәтер дә яшәячәк!