Госансамбль песни и танца РТ организует концерты в рамках «Пушкинской карты»

«Культура» милли проектының «Пушкин картасы» федераль программасы кысаларында Татарстанның Дәүләт җыр һәм бию ансамбле быел октябрь һәм ноябрь айларында алты концерт оештыра.

Танылган коллектив артистлары республиканың мәгариф учреждениеләре һәм авыл мәдәният йортлары сәхнәләрендә чыгыш ясаячак.

Беренче концерт 11 октябрьдә Биектау үзәк Мәдәният йортында була. 14 һәм 17 октябрьдә ТР Дәүләт җыр һәм бию ансамбле Казанның 6нчы һәм 33нче гимназияләрендә чыгыш ясаячак. 18 октябрьдә коллективның чыгышы 144нче мәктәптә, ә бер айдан соң, 18 ноябрьдә 161нче мәктәптә көтелә. «Пушкин картасы» программасын тормышка ашыру 20 ноябрьдә Тәтеш районы Мәдәният йортында чыгыш ясап төгәлләнәчәк.

«Пушкин картасы» федераль проекты кысаларында Татарстан Республикасы Дәүләт җыр һәм бию ансамбле «Без бергә» программасын тәкъдим итәчәк.

«Без бергә» концерт программасы «Зөбәрҗәт» татар халык җыры, «Весялуха» белорус биюе һәм дәртле рус «Субботея»се кебек номерлар  аркасында уникаль колорит алды. Ә «Тыпырдау» һәм «Себерчә» хореографик номерлары тамашачыларны Себер татарлары фольклоры белән таныштырыр. Программаны Россия халыклары фольклорына нигезләнгән «Дуслык» вокаль-хореографик композициясе тәмамлый.